Undanfarið hef ég verið að gera mikið af Frönskum makkarónum eða French Macarons eins og þær eru nefndar á ensku. Þetta eru litlar gómsætar kökur sem eru settar saman með eggjahvítum, sykri og möndlumjöli með ljúffengu kremi á milli. Þessar litlu kökur eru afar skemmtilegar og hægt að gera þær í öllum regnbogans litum með mismunandi bragði. Ég er búin að spreyta mig á nokkrum litum, nokkrum fyllingum og smá skreytingum ef svo má segja. Ég hef verið að styðjast við tvær uppskriftir, eina úr bókinni Macaron Magic eftir Jialin Tian og Joanne Chang sem birtist á Fine Cooking. Á seinni hlekknum má einnig finna mjög gagnlegt kennslumyndband. Uppskriftin sem birtist hér er byggð á þessum tveimur en þetta er sú blanda sem hefur hjálpað mér að ná þessum flottu og bragðgóðu kökum.
Uppskrift, makkarónukökur:
- 210 gr flórsykur*
- 125 gr möndlumjöl**
- 115 gr eggjahvítur við stofuhita ca 3-4 stk, 3-4 daga gamlar***
- 50 gr strásykur
- 1/2 tsk eggjahvítuduft
- Matarlitur eftir smekk
- Uppáhálds smjörkrem (ég notaði uppskriftina sem ég nota venjulega en hafði hlutföllinn 50% ósaltað smjör og 50% smjörlíki)
- Sítrónu custard (sjá hér)
- Súkkulaði ganache (sjá hér)
* Ég nota flórsykur í stað venjulegs sykur þar sem ég á ekki matvinnsluvél sem mylur sykurinn í fínt duft.
** Ég kaupi tilbúið möndlumjöl af sömu ástæðu og með sykurinn, ég á ekki matvinnsluvél til að vinna hráefnin saman.
*** Þetta er eitt af lykilatriðum uppskriftarinnar. Ég aðskil eggin helst 3-4 dögum fyrir bakstur og jafnvel 4-5 dögum fyrr ef ég man eftir því. Báðar uppskriftir segja að einn sólarhringur sé nóg en mín reynsla er að það mistekst frekar ef ég geri það.
Áhöld:
- Hrærivél
- Skálar
- Sigti
- Sprautupoki
- Hringlaga sprautustútur, t.d. Ateco milli #806 og #809
- Vigt
- Smjörpappír
- Bökunarplötur
Leiðbeiningar í máli og myndum:
- Takið saman hráefnin og vigtið þau. Sigtið möndlumjölið og flórsykurinn saman 2-3 umferðir.
- Þeytið eggjahvítur og eggjahvítuduft á miðlungshraða, þegar þeytarinn er farinn að mynda slóð (ca 1-2 mín) bætið þá strásykrinum út í einni matskeið í einu. Þeytið þangað til stífir og beinir toppar myndast. Ef krullast upp á endann hafið þið ekki þeytt nóg.
- Blandið saman þurrefnunum og eggjahvítunum með sleif, setjið matarlitinn út í þessu stigi. Hrærið vel saman eða þangað til blandan er orðin hæfilega blaut. Gott viðmið er að deigið falli af sleifinni og myndi einskonar borða sem hverfur í degið á ca 15-18 sekúndum. Markmiðið er að hafa rétt magn af lofti í kökunum, ef loftið er of mikið lyftast þær of hratt og springa. Ef loftið er of lítið myndast ekki fótur sem gefur kökunum sitt einkennandi útlit.
- Setjið deigið í sprautupokann og sprautið beint niður í ca 2-3cm hringi. Kökurnar munu svo leka aðeins og stækka. Skellið plötunni aðeins í borðið á alla kanta, mum hjálpa við að mynda “fótinn”. Leyfið að standa í skamma stundu. Gæti tekið 10-30 mínútur eftir rakastigi. Hitið ofninn í 160°C, enginn blástur.
- Bakið eina plötu í einu í næst efstu rim í 12 mínútur. Athugið að bökunartími getur verið breytilegur og þarf að athuga með hitastig ofnsins því þeir geta verið mjög misjafnir og er nauðysnlegt að hafa rétt hitastig. Of mikill hiti eða of bakaðar kökur missa lit og verða líkari maregnstoppum sem er ekki það sem við viljum.
Í myndagalleríinu getið þið skoðað hvert stig fyrir sig. Þar sem ég var að gera fjóra liti þá eru mismunandi litir eftir stigum 
Ótrúlega girnilegt hjá þér
Hvað er uppskriftin sem þú gefur upp í margar kökur? Langaði líka að forvitnast, hefur þú prufað að frysta kökurnar, hvernig þær koma út efitr frost?
Kv,
Sæl Harpa Hrund,
Afsakaðu að ég skuli ekki hafa svarað þessari spurning. Hún hefur farið eitthvað framhjá mér. Minnir að einföld hafi verið um 90 kökur eða 180 helmingar. Fjöldi fer samt svolítið eftir stærð, sumir vilja hafa þær minni og aðrir stærri
kv. Eva
Ég er nú svo vitlaus í þessu, en get ég sleppt eggjahvítuduftinu. Og get eg sett gullflögur eða eitthvað á þær, áður en þær fara í ofninn.
Sæl Bergþóra,
Þú getur sleppt eggjahvítuduftinu, þetta er stundum notað til að auka stöðugleikann. Mín reynsla er þó sú að það er afar mikilvægt að skilja eggjahvíturnar frá a.m.k. deginum áður. Ég hef stundum notað um hvítur sem hafa staðið í krukku í ísskápnum í um viku og eru alveg frábærar í frönsku makkarónurnar.
Ég hef ekki prufað að setja skraut ofan á þær fyrir bakstur, en skv. Jialin Tian sem samdi Macaron Magic þá er skrautinu stráð yfir áður en þær eru settar í ofninn.
Vona að þetta hjálpi.